Next to Silence – Prilep Jazz Weekend – 2025

Името на бендот Next to Silence потекнува од реченица во канадски џез магазин која ја објаснува музиката како „најубавиот звук покрај тишината“. Сепак музиката на Next to Silence не е ниту најубав звук, ниту тишина. Тоа е нешто измеѓу. Музиката на овој бенд би можела да биде повикување на различни приказни или звучен пејзаж лишен од значење…искуство што може да ве доведе до тишина. Доследни на традицијата да се повикуваат на поими кои имаат пластови од всадени значења, тие звучно го илустрираат она што зборовите само површно го допираат. Со својата музика тие посегнуваат по мноштво природни феномени, древни вештини, загадочни адети, отелотворени претстави или завиени досетки, а кои добиваат сосема ново постоење и смисол во нивните композиции. Next to Silence истото ќе го срочат и на нивниот настап на Врбјанска Чука, каде за првпат во анплагд издание ќе ја изведат музиката од своите албуми и ќе и‘ дозволат да шета низ сетилата на присутната публика.