Црковен Хор СВЕТА ПЕТКА

Црковниот хор „Света Петка“ од Прилеп е формиран во 2015 година од протопсалт м-р Гоце Секулоски, за потребите на новоизградениот истоимен храм на „Света преподобна маченица Параскева – Петка“, со примарна цел да учествува во парохискиот богослужбен живот и духовна дејност на споменатиот православен храм, како и да даде свој придонес во развојот на литургиската музика во Македонската Православна Црква.

Хорот, покрај учеството во молитвено-литургискиот живот на Православната црква родниот Прилеп, заедно со својот скратен состав ансамбл „Пелагонитиса“, организирал хуманитарни концерти и настапува на неколку културни манифестации во Република Македонија.

Од нив се издвојуваат: Прилепско лето, Денови на крал Марко, Фестивал за црковно пеење „Св.Нектариј Битолски“, Хорскиот фестивал „ТЕ-ХО“- Тетово, Награди „3-ти Ноември“, јубилеј 95 години Богословски Факултет во Софија, каде зема учество и во научна конференција посветена на делото на прилепчанецот и Старозагорски митрополит Методиј Кусев во Софија.

Од музички изданија, поддржан од Општина Прилеп го издава мултимедијалното ДВД „Крепост и Достолепие Македонски – десет прилепски цркви и манастири“, со што се дава особен придонес кон развојот на манастирскиот и духовниот туризам во градот.

Во својата програма, хорот негува музика од повеќе жанрови и категории во хорското творештво, од композитори на рана музика, како што се: Палестрина, Бирд, до руски, српски, украински, бугарски и македонски композитори (Алеманов, Архангелски, Христов, Мокрањац, А.Бадев, К.Македонски, Скаловски, Секулоски итн.)